Африкийн улсуудын нислэгийг цуцалсан орнуудтай АНУ нэгдлээ

Twitter Print
2021 оны 11-р сар 27-нд 10:06 цагт
Мэдээний зураг,

Коронавирусын шинэ хувилбарын тархалттай холбоотойгоор АНУ Өмнөд Африк болон Африкийн 7 улсаас нислэг хүлээж авахаа зогсоох шийдвэр гаргажээ.

Ирэх даваа гарагаас АНУ Өмнөд Африк, Ботсвана, Зимбабве, Намиби, Лесото, Свазиланд, Мозамбик, Малави зэрэг орнуудаас зөвхөн өөрийн улсын иргэдээ л хүлээн авах аж.

Их Британи болон Европын холбоо шинэ хувилбарын халдвар бүртгэгдсэн улс орнуудын нислэгийг хүлээж авахаа хэдийн зогсоосон ба Канад улс мөн адил шийдвэр гаргахаар төлөвлөжээ.

ДЭМБ Африкийн хэд хэдэн улсад бүртгэгдсэн коронавирусын шинэ хувилбарт Омикрон гэсэн нэр өгсөн ба уг хувилбар нь "санаа зовоож" байна хэмээн мэдэгсэн юм.

АНУ-ын Ерөнхийлөгч Жо Байден шинэ хувилбарын тухай шинэ баримт мэдээлэл гарах хүртэл Вашингтон "урьдчилан сэргийлэх" алхмууд хийж байгааг онцолжээ. Омикрон вирус нь Өмнөд Африкт илэрсэн мэдээлэл анх 11-р сарын 24-нд ДЭМБ-д ирсэн ба түүнээс хойш уг хувилбар Африкийн хэд хэдэн улс, Хонгконг, Бельги, Израиль улсад бүртгэгджээ.

Эрдэмтэд коронавирусын шинэ хувилбарын мутацийн талаар судалж байгаа ба уг хувилбар хэр аюултай болохыг, ямар арга хэмжээ авахыг ойлгох хүртэл хэдэн долоо хоног болно гэжээ.

Урьдчилсан байдлаар шинэ хувилбар нь коронавирусын бусад хувилбаруудтай харьцуулахад халдварлах чадвар өндөр гэж гарчээ.

Түүнчлэн шинэ хувилбар бусад хувилбаруудтай харьцуулахад мутаци ихтэй учраас анх Хятадын Ухань хотод илэрсэн коронавирусын эсрэг бүтээгдсэн вакцинууд нь уг хувилбарын эсрэг үр дүн үзүүлэхгүй байж болзошгүй аж.

ДЭМБ-аас мэдээлснээр шинэ хувилбарын халдварын 100 хүрэхгүй тохиолдол бүртгэгдсэний дийлэнх нь Өмнөд Африкийн Гаутенг мужид бүртгэгджээ.

Өмнөд Африкийн хүн амын зөвхөн 24 орчим хувь нь л коронавирусын эсрэг вакцинд хамрагдсан нь тус улсад коронавирусын халдвар огцом нэмэгдэх таатай нөхцөл болж байгааг эрдэмтэд онцолжээ.

Эх сурвалж: BBC

Содномцэрэнгийн Энхзаяа 

mongolcom.mn

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.