ОХУ-ын Ерөнхийлөгч Владимир Путин Оросын иргэншил аваагүй иргэдийг ОХУ-д нэгтгэсэн Украины газар нутгаас албадан гаргах тухай хуулийн төслийг баталжээ.
Уг хуулийн төсөлд Украины иргэд, Донецк эсвэл Луганскийн үнэмлэх эзэмшдэг иргэд ОХУ-ын иргэн болох эсвэл болохгүй байх хүсэлтээ гаргах ёстой ба Оросын иргэн болохоос татгалзсан иргэд 2024 оны 7-р сараас гадаадын иргэн гэсэн нэршилд багтаж эхлэх аж.
Ингэснээр тэдгээр иргэдийг ОХУ өөрийн гэж үзэх газар нутгаасаа албадан гаргах эрхтэй болох юм.
Түүнчлэн ОХУ-ын "үндэсний аюулгүй байдалд заналхийлсэн" иргэдийг албадан гаргах тухай тусдаа заалт оруулжээ.
ОХУ-д нэгтгэсэн Донецк, Луганск, Херсон, Запорожье мужийн иргэдээс ОХУ-ын "үндсэн хуулиар тогтоосон дэглэмийг хүч хэрэглэн өөрчлөх"-ийг дэмжсэн, террорист болон экстремист байгууллагыг санхүүжүүлдэг, "зөвшөөрөлгүй" жагсаал цуглаанд оролцсон иргэдийг албадан гаргаж, ОХУ-ын хилээр дахин нэвтрүүлэхгүй гэж заажээ.
Эх сурвалж: meduza.io
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
