Нэг удаа би гэртээ орж ирээд “компьютерээ асаая” гэтэл ток тасарчихсан байдаг байгаа. Тэгээд л би хав харанхуйд хэсэг суулаа. Та нар гэрийнхээ асдаг анивчдаг бүх юмыг унтраагаад, харанхуйд буйдан дээрээ хэвтээд өөрөөсөө “Би ер нь хэн юм бэ? Би яаж амьдраад байна вэ?” гээд асуугаад үзээрэй.
Хүн гэдэг амьтан яах гэж амьдардаг юм бэ? Би энэ асуултанд хариулахаас зайлж олон жил тойрч гүйсэн. Мансуураад л, уугаад л, зодоон цохион хийж “Би чухал” гэж томроод л. Гэтэл амьдралын жинхэнэ утга учир хайрлахад л оршдог юм шд. Хайрлана гэдэг бол золиослохын нэр... Золиослоно гэдэг бол өгөхийн нэр. Ердөө л энэ... схем нь маш энгийн.
Хайр сэтгэл гэдэг бол мэдрэмж биш, буян юм. Жишээ нь, метронд зорчин яваа эмгэнд суудал тавьж өгөхий тулд түүнийг гал халуун хайраар хайрлах албагүй. Зүгээр л босоод өгөхөд л болно. Хайрлана гэдэг бол ямар нэгэн үйлдэл хийхийн нэр... Үйлдэл хийнэ гэдэг бол өгөхийн нэр. Өгөх гэдэг нь ямар нэгэн юмаа илүүчилж өгөхийг бус харин цаг зав, мөнгө төгрөг... Заримдаа бүр амьдралаа зориулахыг хэлнэ.
Хүмүүс хоорондын харилцаа шиг чухал зүйл гэж энэ хорвоод үгүй. Хот суурин газар суудаг бидний хувьд ажил хөдөлмөр, материаллаг эд зүйлс, ололт амжилт чухал санагддаг. “Амжилт” гэдэг үг “амжих” гэдэг үгнээс гаралтай. Тэгээд л бид юм юмыг амжуулах гээд давхиад л байдаг... Жинхэнэ нандин чухал зүйл буюу эргэн тойронд байгаа хүмүүсийнхээ царайг олж харалгүй өнгөрч давхиад л...
Хэрэв чи яруу найрагч бол нэг сайхан шүлэг зохио. Сэтгүүлч бол нэг сайхан нийтлэл бич. Амьдралаас сайн сайхан, шулуун шударга, цэвэр ариун зүйл олж харан биднийг хүрээлж буй энэ түнэр харанхуйд өчүүхэн атугай завсар гаргаж гэрэл гэгээ тусга. Жишээ нь, ажлынхан чинь ажил дээрээсээ сэлбэг авч гардаг уу? Тэгвэл ядаж чи... ядаж өнөөдөр битгий авч гар. Өдөрт “косяк” долоог татдаг бол ядаж өнөөдөр тавыг тат... Энэ мэтээр юу ч хийсэн өмнөх өдрийнхөөсөө арай дээр хийгээд л бай, өдөр бүр. Тэгээд нэг л мэдэхэд чи нэг сайн зуршилтай болчихсон байна... Сайн юм хийх зуршилтай.
Насныхаа эцэст энгүүн хүн болох нь амьдралын зорилго. Дэргэдэх хүмүүст чинь чамтай хамт байхад сайхан, тайван, амар, бүх юм ойлгомжтой, энгийн санагддаг байх учиртай.
- Петр Мамонов
Орчуулсан: Өлзийбатын Уянга
Энэ мэдээ танд таалагдаж байвал LIKE хийгээрэй. Танд баярлалаа.
