“Хар сарнай“ С.Амармандах коронавирустэй тэмцэхэд 30 сая төгрөг хандивлалаа

Twitter Print
2020 оны 02-р сар 29-нд 11:18 цагт
Мэдээний зураг,

Титэмт вирусын халдвар дэлхий даяар тархаж, хүн төрөлхтнийг айдас хүйдэст автуулаад байгаа энэ үед Монгол улс өвчин тархахаас сэргийлэх бүхий л шаардлагатай арга хэмжээг авсаар байгаа билээ.

Энэхүү хүнд бэрх үед ЭМЯ, Улсын онцгой комисс, ОБЕГ-т иргэд, ААН-үүд хандив өргөсөөр байна.

“Оюутолгой” компани нийт 310 сая төгрөг хандивлажээ. Тус компанийн “Говийн оюу” хөгжлийг дэмжих сангаас Өмнөговь аймгийн Онцгой комисст 200 сая, Ханбогд сумын Онцгой комисст 10 сая, Монголын уул уурхайн үндэсний ассоциацын санаачилсан, “Нэг дэлхий, хариуцлагаар нэгдье” аянд нэгдэн, дахин 100 сая төгрөг хандивлажээ.

Мөн “Эрдэнэс Монгол” компани, Уул уурхайн эрхзүйн сан, АМГТГ, “Шивээ-Овоо” ХК, “ЭТТ майнинг”-ийн хамт олон “Нэг дэлхий, хариуцлагаар нэгдье” аяны хүрээнд нэг өдрийн цалингаа хандивласан юм.          

Энэхүү аянд иргэд ч сайн дураар хамрагдсаар байгаа юм. Өчигдөр Монгол улсын 20 дахь аварга С.Мөнхбат, иргэн Д.Доржпүрэв нар тус тус 20 сая төгрөг Улсын Онцгой комисст хандивласан буухиаг “Хар сарнай” хамтлагийн ахлагч, дуучин С.Амармандах гэр бүл, найз нөхдийнхөө хамт коронавирусын халдвар, тархалтаас сэргийлэх ажилд 24 цагийн турш тасралтгүй зүтгэж байгаа эрүүл мэндийн байгууллагын ажилчдын хамгаалах хэрэгсэл, хувцас хэрэглэл авахад зориулж хувиасаа 30 сая төгрөг хандивласнаар үргэлжилж байна.

Тэрбээр өнөөдөр 11.00 цагаас болох ЭМЯ-ны ээлжит хэвлэлийн бага хурлын дараа эрүүл мэндийн салбарт зориулж байгаа сэтгэлийн хандив, мөнгөн тусламж, маск зэргийг яамны удирдлагуудад гардуулж өглөө.

Г.Ганаа

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.