“Хүжийн гал”-д хичээллэх хүүхдүүдийн нэрийн өмнөөс...

Twitter Print
2021 оны 02-р сар 18-нд 17:09 цагт
Мэдээний зураг,

3 сарын 01-ээс танхимаар хичээллэхгүй гэж ЗГ шийджээ. Короанагаас болж манайхаас өөр ямар улс бүтэн 2 жил сургуулиа хаасан бэ? Байхгүй шүү. Америкт гэхэд сургуулийн хүүхдүүд коронагийн халдвар авсан ч ханиад хүрсэнтэй адил чөлөө авч эмчлүүлээд л ирнэ. Хичээл сургууль нь танхимаар хэвийн явж байна.

Хөл хорио чинь Улаанбаатарт хүүхдүүдийн хувьд Хүхэртийн хөндийд бөөнөөр нь ХОРИХ ЛАГЕРЬ болчихоод байна. Шатаах зуух нь ХАРАНХУЙ, МУНХАГИЙН ХОНГИЛ юм биз. Өвчин эсэргүүцэх дархлааны амин сүнс бол ХӨДӨЛГӨӨН, ЭРҮҮЛ АГААР. Багаасаа суусан байгалийн дархлааг гүйцэх вакцин байхгүй дээ. Гэтэл Улаанбаатарт хүүхдүүд гэрээсээ гарч тав алхах эрхгүй. Сэлбэ голоор хүүхдээ салхилуулья гээд гарахад цагдаа хөөж байна.

Амьсгалж байгаа агаар нь хүхэр, нүүрсний утаа.Ирээдүйд ийм орчинд өссөн хүүхдүүд эрүүл саруул, идэвхитэй амьдралтай байж чадах уу? Хэрвээ сургууль хичээллэхгүй юм бол бөөнөөр нь хортой орчинд хорьж яах юм бэ? Агаар салхинд гаргаж, зусландаа ядаж явах замыг нь нээж өгөөч. Ингэхэд Улаанбаатарт Корона гарсны төлөө Ховд аймгийн Мөст сумын сургууль яагаад хичээллэж болохгүй гэж. Нийтээр нь хомроглон хэлмэгдүүлэх гэж үүнийг хэлдэг юм.

Хотын захын хороолол, хөдөөгийн айлуудад интернэт байтугай компьтер ч байхгүй. Аав ээж нь хүүхдийнхээ ирээдүйн боловсролд анхаарах манатай, аяга хоолоо яая гэж байгаа улс. Энэ олон сарын хөл хорионоос болж маш олон хүүхэд сургууль завсардана. Хичнээн олон бяцханы ирээдүй хар нүхэнд унах бол? "Хүжийн галд сурч болоод байсан юм чинь цахимаар сур " гэжээ. Цахим хичээл үнэндээ ХАЛТУУРдаж байна. Боломжтой нэг нь гэрээр багш аваад хичээллэж байна. Хэрвээ цахимаар боловсролын асуудлыг шийдчихдэг байсан бол дэлхий нийтэд СУРГУУЛЬ байгаад ч яах юм бэ?

Гэрээрээ эцэг эх нь боловсрол олгочихдог юм бол БАГШаар ч яах юм бэ?

Иргэд нь боловсрол мэдлэггүй улс сүйрч, бусдын идэш болж дуусдгийг зөндөө л харлаа. Манайх харин ч Оросуудын буянаар социализмын 70 жилд боловсролдоо анхаарч, үндэстний сэхээтнүүдийг бэлтгэж авсныхаа хүчинд өнөөдрийг хүрлээ. Өнгөрсөн жилийн хөл хорионоос хойш ард түмэн "сургууль завсардалт"-ыг маш тэвчээртэй хүлээсэн. Одоо арай ч дээ. Энэ хичээлийн жил дуусах гэж байна. Бүтэн жил ганцхан сар хичээллэж болдог юм уу? 9 сард хагас дутуу. 11 сарын эхэнд хаагдсан. Тэгсэн мөртлөө сонгууль бол хийчихнэ.

"Эрүүл мэнд чухал, хүүхдээ эрсдэлд оруулахгүй, цахим хичээл хангалттай " гэж үзэж байгаа эцэг эхчүүд хүүхдээ сургуульд явуулахгүй байж болно. Харин халдвар хамгааллаа сахиад хүүхдээ танхимаар хичээллүүлэх саналтай над шиг эцэг эх ч бий. Зун нөхөж хичээллүүлнэ гэнэ үү? Зун хүүхэд агаар салхинд гарч, бие бялдараа чийрэгжүүлж, ажил хөдөлмөрийн зах зухыг сурах "амьдралын хичээл" ордог юм. Зун байгаль эхээс олж авсан амин тэжээлээрээ өвлийн томуу, элдэв бэрхшээлийг давдаг юм. Монгол хүүхдүүдийг эрүүл мэнд, боловсролоос нь салгах захиалга юм уу? эсвэл Монгол хүнийг устгах бодлого юм уу?

Хятад, Орос,АНУ бүгд коронатай ч хичээл сургуулиа тасалсангүй. "Үндэстэнг устгая гэвэл боловсролыг нь устга" гэдэг хууль үйлчилдэг учраас ямар ч улс орон эцсийн сохор зоосоо ирээдүйн иргэдийнхээ боловсролын төлөө зориулдаг юм шүү. Сонгууль хийх болохоороо томчууд цугларч болдог, сургууль хичээллэх болохоор хүүхдүүд цуглаж болдоггүй. Сонгууль, сэнтий сандлаас өөрийг боддоггүй та нар шиг намчидаар жирийн иргэд бид үр хүүхдийнхээ ирээдүйг САЙХАН САМРУУЛМААРГҮЙ БАЙНА . САМАРСАЙХАН АА!

Сэтгүүлч Б.Отгон

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.