Энэтхэгчүүд Нарендра Модийг сонгуулийн кампанит ажил, шашны баярыг зохион байгуулахыг зөвшөөрснөөр халдвар тархсан хэмээн буруутгаж байна

Twitter Print
2021 оны 05-р сар 04-нд 13:00 цагт
Мэдээний зураг,

Энэтхэгчүүд Нарендра Модийг халдварын тархалттай хангалттай тэмцэж чадахгүй байна гэж үзжээ.

Энэтхэгт коронавирусын халдварын тархалт хурдацтай нэмэгдэж, эмнэлгүүд ачааллаа дийлэхээ больсонтой холбоотойгоор резидент эмч нар болон дадлагажигч сувилагч нарын шалгалтыг хойшлуулаад байна. Тус улсад сүүлийн 12 өдрийн турш нэг өдөрт бүртгэгдэх коронавирусын халдварын тохиолдлуудын тоо 300 мянгаас буугаагүй ба халдвар авсан нийт иргэдийн тоо бараг 20 саяд хүрээд байна.

Эрүүл мэндийн салбарын мэргэжилтнүүдийн хэлж байгаагаар бодит байдал дээр коронавирусын халдвар авсан иргэдийн тоо 5-10 дахин их байх магадлалтай аж.

Эмнэлгүүд дүүрч, хүчилтөрөгчийн хомсдол үүсч, цогцос хадгалах байрууд болон цогцос чандарлах газрууд коронавирусын халдварын улмаас нас барсан иргэдийн цогцсоор дүүрчээ. Коронавирусын халдвар авсан иргэд эмнэлгийн орон дээр, яаралтай тусламжийн машин дотор, эмнэлгийн гадаа амиа алдсаар байна.

Сайн дурынхан эмнэлгийн гадаа асарууд босгож, эмнэлэгт багтахгүй байгаа өвчтнүүдийг хэвтүүлж, хүчилтөрөгч амьсгалуулж байна. Сайн дурынхны хэлж байгаагаар 20 минут тутам шинэ өвчтөн нэмэгдэж байгаа аж.

Коронавирусын цар тахлын 2 дахь давалгаанд Энэтхэгийн томоохон хотуудаас гадна жижиг хотууд, тосгонууд ихээр өртжээ.

Энэтхэгчүүд Ерөнхий сайд Нарендра Модийг коронавирусын халдварын тархалтын эсрэг арга хэмжээ эрт аваагүй хэмээн шүүмжилж байна. Тэрээр өнгөрсөн 3 ба 4-р саруудад Энэтхэгийн 5 мужид сонгуулийн кампанит ажил болон шашны баяр ёслолыг зохион байгуулахыг зөвшөөрснөөр амны хаалтгүй олон тооны хүнийг нэг дор цугларах, коронавирусын халдвар тархах нөхцлийг бүрдүүлсэн аж.

Өнгөрсөн 3-р сарын эхээр Энэтхэгийн засгийн газрын дэргэдэх эрдэмтдийн баг эрх баригчдад тус улсад коронавирусын шинэ хувилбар илэрсэн нь хурдацтай тархах аюултай гэдгийг анхааруулжээ. Гэсэн ч засгийн газар хөл хорио тогтоогоогүй аж.

Энэтхэгийн сөрөг хүчний 13 намын удирдлагууд өнгөрсөн ням гарагт Нарендра Модид иргэдийг коронавирусын эсрэг дархлаажуулах, эмнэлгүүд болон эрүүл мэндийн байгууллагуудад хүчилтөрөгч нийлүүлэх ажлыг эрчимжүүлэхийг шаардсан захидал бичжээ.

Энэтхэг улс нь вакцины үйлдвэрлэлээрээ дэлхийд тэргүүлдэг ч тус улсад коронавирусын вакцины хомсдол үүсээд байна. Энэтхэгийн хүн амын зөвхөн 9 хувь нь л коронавирусын эсрэг вакцинд хамрагджээ.

Эх сурвалж: https://www.reuters.com/world/asia-pacific/indias-covid

Орчуулсан: Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.