Владимир Путин: НАТО Москваг хуурсан

Twitter Print
2021 оны 12-р сар 25-нд 10:40 цагт
Мэдээний зураг,

ВЛАДИМИР ПУТИН: ЭНЭ ОНЫ СҮҮЛЧИЙН ХЭВЛЭЛИЙН ХУРАЛ:

“...Тэд 1990 онд НАТО ОХУ руу нэг алхам ч урагшлахгүй гэж хэлсэн. Гэтэл тэд өнөөдөр биднийг увайгүйгээр хуурч, Польш, Румын зэргээр НАТО ОХУ-ын хилийн ойролцоо улам хүчээ бэхжүүлсээр байна. Бид АНУ эсвэл Их Британийн хилд ойртсон гэж үү. Одоо тэд Украиныг НАТО-д элсүүлэхээр зорьж байна. Өөрөөр хэлбэл, ОХУ-ын хилийн ойролцоо НАТО-гийн зэвсгийн системүүд бий болно. Уг нь бидэнд ийм зүйл огт болохгүй гэж амласан. Тэд бидэнд ийм амлалт цаасан дээр хаана бичигдсэн юм бэ. Хаана ч биш. Тиймээс там руугаа тонил. Бидэнд чиний асуудал хамаагүй гэж хандсан”...

ОХУ-ын Ерөнхийлөгч Владимир Путин пүрэв гарагт Москва хотноо жилийн сүүлийн хэвлэлийн бага хурлаа хийлээ. 2001 оноос хойш зохион байгуулагдаж буй уг арга хэмжээнд сэтгүүлчид нээлттэй оролцож, хүссэн асуултаа асуух боломжтой байдаг.

Тэгвэл Кремлийн хэвлэлийн алба энэ онд цар тахлын улмаас сэтгүүлчдийг бүртгээгүй бөгөөд дотоод болон гадаадын 500 орчим хэвлэл мэдээллийн хэрэгслийг урилгаар оролцуулсан байна. Гэвч пүрэв гаригт болсон арга хэмжээнд 2021 оны Нобелийн энх тайвны шагналт, Оросын нэрт сэтгүүлч Дмитрий Муратов, түүний эрхлэн гаргадаг “Новая газета” сонин тэргүүтэй томоохон чөлөөт хэвлэлүүд уригдаагүй нь эхнээсээ шүүмжлэл дагуулсан юм.

Учир нь, энэ онд ОХУ-ын эрх баригчид сөрөг хүчний лидер Алексей Навалнийг баривчилж, Цагдаагийн албаны тухай хуульд өөрчлөлт оруулах зэргээр хүний эрхтэй холбоотой асуудлуудад ороод байгаа юм. Түүнчлэн, ОХУ болон НАТО-гийн хурцадмал харилцаа Хүйтэн дайнаас хойших хамгийн ноцтой түвшинд ирээд байгаа гэдэг утгаараа Кремлийн тэргүүн Украины хямралын талаар ямар байр суурь илэрхийлэх нь анхаарлын төвд байсан юм.

Тиймээс дөрвөн цаг орчим үргэлжилсэн хэвлэлийн хурлын үеэр ОХУ-ын Ерөнхийлөгч Владимир Путин Украины асуудал болон НАТО-гийн хямралд ямар байр суурь илэрхийлснийг эмхэтгэн хүргэж байна.

НАТО Москваг хуурсан

Кремлийн тэргүүн пүрэв гаригт Украины хямралд АНУ болон НАТО тэргүүтэй барууны эвслийг буруутгасан бөгөөд амлалтаа зөрчиж, шударга бус тоглож байна гэж шүүмжилсэн юм.

Владимир Путин: Тэд 1990 онд НАТО ОХУ руу нэг алхам ч урагшлахгүй гэж хэлсэн. Гэтэл тэд өнөөдөр биднийг увайгүйгээр хуурч, Польш, Румын зэргээр НАТО ОХУ-ын хилийн ойролцоо улам хүчээ бэхжүүлсээр байна.

Бид АНУ эсвэл Их Британийн хилд ойртсон гэж үү. Одоо тэд Украиныг НАТО-д элсүүлэхээр зорьж байна. Өөрөөр хэлбэл, ОХУ-ын хилийн ойролцоо НАТО-гийн зэвсгийн системүүд бий болно. Уг нь бидэнд ийм зүйл огт болохгүй гэж амласан. Тэд бидэнд ийм амлалт цаасан дээр хаана бичигдсэн юм бэ. Хаана ч биш. Тиймээс там руугаа тонил. Бидэнд чиний асуудал хамаагүй гэж хандсан.

Энэ байдал олон жилийн турш үргэлжилсэн. Бид асуудал бүрт өөрийн эрх ашгийг хамгаалж, санаа зовнилоо илэрхийлдэг ч “Чиний асуудал бидэнд хамаагүй. Бид шаардлагатай гэж үзсэн зүйлээ хийх болно” гэж ханддаг. Украины асуудалд ОХУ дангаараа энх тайвны баталгаа өгөх ёсгүй. Эсрэгээрээ тэд баталгаа гаргах ёстой. Бид ярилцаж, энэ асуудлыг нэг мөр шийдэх ёстой.

ЗХУ задарч, олон улс болж бутарсан. Гэсэн ч энэ нь тэдэнд хангалттай байгаагүй. Тэдний бодлоор бид хэдэн хэсэгт хуваагдаж, ердөө 146 саяулаа үлдсэн ч ОХУ өнөөдөр хэтэрхий том гүрэн хэвээр байна.

Бид ОХУ-ын аюулгүй байдлыг хэрхэн хангахаа маш сайн мэдэж байгаа. Тиймээс НАТО цаашид дорно зүгт тэлэх ёсгүй гэдэг дээр хатуу байр суурьтай байгаа. Одоогоор бид ерөнхийдөө эерэг хариу үйлдэл үзүүлж байна. Одоо асуудал тэдний талд байгаа. Тиймээс хариу хэлэхийг хүлээж байна. АНУ асуудлыг энхийг замаар шийдвэрлэж, яриа хэлэлцээ хийхэд бэлэн байгаагаа илэрхийлсэн. Талууд төлөөлөгчдөө томилсон бөгөөд нөхцөл байдал хэлэлцээний замаар шийдэгдэнэ гэдэгт би итгэлтэй байна.

Москва Украины тусгаар тогтнолыг эсэргүүцээгүй. Гэтэл Киев ЗХУ-ын үеийн түүхэн газар нутгаас иргэдийг хөөж байна. Тэд өөрсдийн нутаг дэвсгэрт амьдардаг Оросуудыг Польш, Унгар, Румынууд шиг уугуул бус хүмүүс гэж зарласан. Товчхондоо, Украинууд Оросууд болон орос хэлээр ярьдаг ард түмнийг газар нутгаасаа шахаж, гадуурхаж байгаа. Украины Ерөнхийлөгч асан Виктор Янукович үүний эсрэг байсан ч 2014 онд болсон цэргийн эргэлтийн дараа өнөөдрийн энэ бүх хямрал эхэлсэн.

Бид Севастополь, Крым дэх Оросын ард түмнийг хамгаалахгүй байж чадахгүй. Тэгэх ч боломжгүй. Украинууд бидэнд өөр сонголт үлдээгээгүй. Үүний нэгэн адил, Украины зүүн хойд хэсэг, Донбасст болж байгаа явдлыг бид зүгээр хараад суухгүй.

Үнэндээ бид Украинтай найрсаг хөршийн харилцаа тогтоохыг хүсдэг. Хамгийн гол нь бид үүнийг хүсэж байна. Бид энэ чиглэлд ямар ч үнээр хамаагүй, боломжтой бүхнийг хийж байна. Хийсээр ч байх болно. Гэвч Украины өнөөгийн эрх баригчидын хандлагаас харахад бид энэ харилцааг хэрхэн болгох бараг боломжгүй харагдаж байна. Украины Ерөнхийлөгч Владимир Зеленский төрийн эрхэнд гарсныхаа дараа өмнөх удирдагчдынхаа нэгэн адил радикал нөлөөнд автсан.

Товчхондоо Украинууд Донбассын асуудалд хөндлөнгөөс оролцохгүй байхыг шаардаж, тэнд байгаа өөрсдийн иргэдээ хамгаалах, тэгэхийг оролдсон тохиолдолд хориг арга хэмжээ авна гэдгийг анхааруулж байна. Энэ нь бидэнд Киев Донбасст дахин цэргийн ажиллагаа эхлүүлэхээр бэлдэж байна гэх сэтгэгдлийг төрүүлж байна.

Доржийн Дашбилэг

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.