Уучлалт гуйлтгүй урьдаас төлөвлөсөн алхам

Twitter Print
2013 оны 12-р сар 28-нд 10:12 цагт
Мэдээний зураг,

Японы Ерөнхий сайд Синзо Абэ милитаризмын бэлэг тэмдэг гэж тооцогддог Ясукуни сүмд очиж хүндэтгэл үзүүлсэн явдлыг Хятад, Өмнөд Солонгос болоод Азийн бусад улс эгдүүцэн шүүмжилж байна. Өнгөрсөн зууны дунд үед Японы түрэмгийллийг амссан эдгээр улс мэдээж энэ явдалд шүүмжлэлтэй хандахыг Абэ мэдэж байсан хэрнээ “Сүмд мөргөл үйлдсэндээ би уучлал хүсэж байна. Энэ явдал бол үнэндээ хөрш орнуудын ард түмнийг гутаан доромжлох санаа агуулаагүй” гэж онцлон тэмдэглэсэн нь дайран дээр давс нэмсэн асуудал боллоо.

Синзо Абэгийн энэ үйлдэл цаанаа олон учир шалтгаан агуулж байгаа нь тодорхой. Нэг талаас авч үзвэл Хятад болон Өмнөд Солонгостой газар нутгийн маргаан гарсан цагаас эхлэн Японы засгийн газар ил тод хатуу арга хэмжээ авах тухай мэдэгдэх болсон. Японы олон нийт ч Ерөнхий сайдыг гадны улс төрийн бодлогын нөлөөнд автахгүй байх, Японы ард түмний итгэл үнэмшлийг хүндэтгэж, ард олондоо илүү ойр байхыг шаардах болсон билээ. Японы олон нийт өнгөрсөн наймдугаар сард Дэлхийн II дайн төгссөнийг тэмдэглэх үеэр Ерөнхий сайдаа Ясукунид айлчлахаас татгалзсаныг хатуу шүүмжилж байсан. Тиймээс Японы одоогийн засгийн газрын чиг шугам Япон үндэстний баримталж ирсэн зарчмаас хазайх учиргүй гэдгийг шаардаж байгаагаас Синзо Абэ яах аргагүй буулт хийх болсон.

Нөгөө талаас сүмд мөргөл үйлдсэн явдал баяр ёслол тэмдэглэж байгаа мэт шинж чанартай болж өнгөрлөө. Учир нь өнгөрсөн оны арванхоёрдугаар сард либерал ардчилсан нам засгийн эрхэнд гарч Абэ танхимаа бүрдүүлсэний яг нэг жилийн ойн дээр боллоо. Энэ бол олон улсын тавцанд улс орны байр суурийг бэхжүүлэх, үндэсний ашиг сонирхлыг илүү идэвхтэй хамгаалахад чиглэгдсэн Абэгийн гадаад улс төрийн тодорхой нэг шугам байх нь тодорхой. Энэ бодлого мэдээж милитаризмын өнгөрсөн үеийг эргээд эрхэмлэн дээдэлж байна гэдэг шүүмжлэл дагуулна гэдгийг Абэ мэдсээр байж Ясукунид мөргөл хийсэн нь улс төрийн шугамаа тодорхой харуулах гэсэн учир агуулгатай холбоотой.

Япон улс АНУ-тай цэрэг, улс төрийн хамтын ажиллагаагаа бэхжүүлэх үндэс суурь нэгэнт тавигдсан учраас Хятадын “өдөөн хатгалгын” эсрэг дорвитой хариу барих сэтгэл зүйг бэлдэх ёстой. Хятадын арми Сенкаку арлуудын бүсэд агаарын довтолгооноос эсэргүүцэн хамгаалах бүс тогтоосон явдалд Япон улс хариу барих арга зам хайж байсан. Энэ ч үндсэн дээр Синзо Абэгийн сүмд мөргөл үйлдсэн явдлыг үүний хариу гэж үзэж болох юм. Үүний өмнө Накасонэ, Коизуми нарын улс төрчид Якусуни сүмд очиж хүндэтгэл үзүүлж л байсан, Хятад, Өмнөд Солонгос эсэргүүцлийн ноот бичиг гардуулж л байсан, тэгэхээр яагаад Абэ өөрийн байр суурийг харуулж болохгүй гэж гэдэгт улс төрийн энэ бодлогын асуудал оршиж байна. Гэхдээ энэ зэрэгцээ Өмнөд Солонгосоос талаас тааламжгүй дарамт шахалт үзүүлж болно.

Японы Засгийн газар одоо Сөүл-Токио-Вашингтон гэсэн цэрэг, улс төрийн гурвалжин байгуулах бодлого баримталж байгаа. Энэ асуудал нилээдгүй маргаан дагуулах байлаа ч гэсэн  бүс нутгийн бодлого дээр судас барьж суугаа “Сэм ах” солонгосчуудын мөрөн дээр нэг алгадаад л бүх зүйл давгүй өнгөрч болно. Синзо Абэ ч өөрөө маш их эрсдэлтэй алхам хийснээ мэдэж байгаа. Японы түрүүчийн Ерөнхий сайд Зюнитиро Коизуми Ясукуни сүмд мөргөсний дараа энэ нөхөр байсан цагт Япон улстай дээд хэмжээний түвшинд харилцаа тогтоохгүй гэж Хятадууд мэдэгдэж байсан. Харин одоо Өмнөд Солонгосчууд мөн Синзо Абэтай аливаа асуудал хэлэлцэхгүй гэсэн мэдэгдэл хийгээд байна.

Р.Этүгэн

Сэтгүүлч Ц.Мөнхбаяр

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.