Лондон Вагнер группыг алан хядах бүлэглэл гэж тооцно

Лондон Вагнер группыг алан хядах бүлэглэл гэж тооцно

Их Британийн засгийн газар Оросын хувийн цэргийн Вагнер группыг алан хядах бүлэглэл хэмээн зарлахаар төлөвлөжээ. Ингэснээр Вагнер группын гишүүн болох эсвэл тус группыг дэмжих нь хууль бусд тооцогдох ба Вагнер группын нэр дээрх өмч хөрөнгийг алан хядах бүлэглэлийн хөрөнгө гэж үзэн, хурааж авах боломжтой болох аж.

Их Британийн Дотоод хэргийн сайд Суэлла Брэйвермэний тодорхойлсноор  Вагнер групп нь Владимир Путины цэргийн зэвсэг бөгөөд тус группын Украин болон Африкт явуулж буй ажиллагаа нь дэлхийн аюулгүй байдалд заналхийлж байгаа аж. 

Түүний хэлснээр Кремль Вагнер группыг улс төрийн зорилгоор ашигласаар байгаа ба тус группыг алан хядах бүлэглэл гэж зарлах нь Их Британийн хуульд заасан арга хэмжээнүүдийг  авахад хялбар болох аж.

Вагнер групп нь ОХУ-ын Украинд явуулж буй дайнд гол үүрэг гүйцэтгэснээс гадна Сири, Ливи, Мали улсад үйл ажиллагаагаа явуулсаар байгаа билээ.

Тус группын хөлсний цэргүүдийг Украины энгийн иргэдийг хороосон, тамлан зовоосон зэрэг дайны гэмт хэргүүдэд буруутгаж байгаа юм.

2020 онд Вагнер группын цэргүүд Ливийн нийслэл Триполи хотын эргэн тойронд тэсрэх бөмбөгнүүд байршуулсан хэмээн Вашингтоны зүгээс мэдэгдсэн бол Их Британийн зүгээс Вагнер групп Мали болон Төв Африкийн Бүгд Найрамдах улсад иргэдийг цаазлах, эрүүдэн шүүх гэмт хэрэг үйлдсэн хэмээн  буруутгаж байжээ.

Вагнер группыг 2014 онд үүсгэн байгуулсан Евгений Пригожин өнгөрсөн сарын 23-нд онгоцны ослоор нас барсан билээ.

2000 оны Терроризмын тухай тогтоолоор Их Британийн Дотоод хэргийн сайд алан хядах үйл ажиллагаатай холбоотой байж болзошгүй гэсэн байгууллагыг алан хядах бүлэглэлийн жагсаалтанд оруулах эрхтэй бөгөөд Вагнер групп нь ХАМАС болон Боко Харам зэрэг алан хядах бүлэглэлүүдийн эгнээнд багтжээ.

Вагнер группыг ямар нэг байдлаар дэмжих, тус группын үйл ажиллагаатай холбоотой асуудлаар уулзалт зохион байгуулах, Вагнер группын далбаа, лого зэргийг харуулах нь гэмт хэрэгт  тооцогдох ба уг хэрэгт буруутай этгээдэд 14 хүртэлх жилийн хорих ял эсвэл 5000 фунт стерлингийн торгууль ноогдуулах аж.

Их Британийн Гадаад харилцааны яамны зүгээс Вагнер группын эсрэг хориг тогтоож, Е. Пригожин болон Вагнер группын цэргийн удирдлагуудын өмч хөрөнгийг царцаасан ч зөвхөн яамнаас тогтоосон  хориг хангалтгүй, Вагнер группыг алан хядах бүлэглэлийн тоонд оруулах нь зүйтэй хэмээн мэдэгдэж байсан аж.

Өнгөрсөн 6-р сард Вагнер группыг үүсгэн байгуулагч Е. Пригожины цэргийн эргэлт хийх гэсэн оролдлого мөн Е. Пригожины үхлээс хойш тус группын ирээдүй тодорхойгүй болсон билээ.

 

Эх сурвалж: Reuters

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.