ОХУ шатахуун, дизель түлшний экспортоо хязгаарлалаа

Энэ сарын 21-нд ОХУ-ын засгийн газар шатахуун болон дизель түлшний экспортоо хязгаарлах шийдвэр гаргажээ. Уг шийдвэрээрээ Москва дотоодын зах зээл дэх шатахууны үнээ тогтворжуулах зорилготой аж.

Оросын засгийн газрын хэвлэлийн албанаас мэдээлснээр Ерөнхий сайд Михаил Мишустин холбогдох бичиг баримтанд гарын үсгээ зурсан байна.

Оросын эрх баригчид экспортын түр хязгаарлалтын ачаар дотоодын зах зээл дээр шатахууны үнэ буурна гэж найдаж байгаа ба өмнө нь шатахууны зах зээлийн тогтвортой байдлыг хангах үүднээс Оросын засгийн газар зах зээлд нийлүүлэх бензин болон дизель түлшний нормативаа нэмэгдүүлж байжээ.

Санкт-Петербургийн хөрөнгийн биржээс мэдээлснээр ОХУ-д АИ-92, АИ-95 шатахууны үнэ өнгөрсөн 4-р сараас нэмэгдэж эхэлсэн аж.

ОХУ-ын Статистикийн албанаас гаргасан статистик мэдээгээр энэ оны 1-р сараас 8-р сарыг дуустал бүх маркийн шатахуунуудын үнэ 7.4 хувиар өссөн байна. 9-р сарын 11-18-ны хооронд бензины үнэ 0.8 хувиар, дизелийн түлшний үнэ 2 хувиар тус тус өссөн байна.

Иймээс дотоодын зах зээл дэх шатахууны үнээ тогтвортой байлгахын тулд ОХУ-ын засгийн газар дээрх шийдвэрийг гаргахад хүрсэн гэжээ.

Засгийн газрын уг шийдвэр гарснаас хойш Санкт-Петербургийн олон улсын түүхий эдийн бирж дээр шатахуун 5.7 хувиар, дизель 2.15 хувиар тус бүр буурсан байна.

Оросын шатахуун, дизель түлшний экспортын хязгаарлалтанд Киргиз, Беларусь, Казахстан, Армен зэрэг улс орохгүй ба ОХУ-ын газар нутгаар дайран шатахуун, дизель түлш тээвэрлэхийг хориглохгүй аж.

Эх сурвалж: vedomosti.ru

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.