Шэньженьд байрлах 73 давхар байшин гэнэт чичирхийлж, иргэдийг яаралтай нүүлгэн шилжүүлэв

Twitter Print
2021 оны 05-р сар 19-нд 11:00 цагт
Мэдээний зураг,

Хятадын Шэньжень хотын төвд байрлах 73 давхар барилга гэнэт чичирхийлж эхэлжээ. Тус барилга дотор электрон барааны дэлгүүрүүд, аж ахуйн нэгжүүд байрладаг ба барилга дотор байсан үйлчлүүлэгчид болон ажилтнуудыг яаралтай нүүлгэн шилжүүлжээ.

Барилга чичирхийлэх үеэр тус бүс нутагт ямар ч газар хөдлөлт бүртгэгдээгүй ба барилгыг чөлөөлсний дараа барилгад урьдчилсан үзлэг хийжээ.

Үзлэгээр барилгын суурь болон ойр орчимд ямар ч хагарал, гэмтэл илрээгүй ба барилгын гадна хана бүрэн бүтэн байгааг тогтоосон байна.

300 метр өндөртэй SEG плазагийн барилгыг 2000 онд барьж дуусгасан ба тус барилга Хятадын хамгийн өндөр барилгуудын 104т, дэлхийн хамгийн өндөр барилгуудын 212-т бичигддэг аж.

Тус барилгын ойр орчмоос хүмүүс сандралдан гүйж буй бичлэг нийгмийн сүлжээнд тархаад байна.

Орон нутгийн цагаар 12 цаг 31 минутанд тус барилга дотор ажиллаж байсан ажилтнууд барилга чичирхийлж буй тухай мэдэгджээ. 14 цаг гэхэд иргэдийг барилгаас нүүлгэн шилжүүлж, барилгыг бүрэн чөлөөлсөн байна.

Хятадын Шэньжень хот нь Хонгконгийг Их газрын Хятадтай холбодог ба тус хот нь Хятадын технологи, инновацийн төв юм.

Шэньженьд Хятадын технологийн Tencent групп болон Huawei компаниудын төв байр байрладаг байна.

Эх сурвалж: https://www.bbc.com/news/world-asia

Орчуулсан: Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.