Тэртээ олон жилийн өмнө нэгэн найз эгч надад "Би 30 гараад удчихлаа. Гэвч чаддаг юм ховор. Юу хийхээ мэдэхгүй байна. Би ер нь өөрийгөө олоогүй хүн юм" гэж хэлэхэд нь юу хариулснаа санадаггүй юм. Айдентитетийн тухай ном унших явцдаа би түүний хариу олсон ч харин тэр эгчийг олохгүй л байна. Мартчихгүйн тулд та бүхэнд хариултыг нь хуваалцья.
Зарим хүмүүс бусдыг их дуурайдаг. Манайд тийм үг хүртэл байдаг. Нэг нь нэг бизнес хийхээр нөгөөх нь яг адилхан хийдэг гэж. Хэн нэгнийг дуурайх энэ хэв маяг манайд маш хүчтэй. Байшин, машин гар утас, бүр өмсдөг хувцас, хийлгэдэг хумс нь хүртэл. Энэ дуурайх байдал бол өөрийгөө олоогүй хүний хамгийн тод жишээ юм.
Хүн яагаад өөрийгөө олдоггүй вэ. Ямар шалтгаан байна вэ?
1. Эцэг эхийн аль нэг нь хүүхэд байхаас эхлээд бүгдийг шийддэг, хүчтэй нөлөө үзүүлдэг байдал. Материаллаг хангамжаас гадна хүүхдийнхээ нөхөрлөл, үерхэл, бүр хүсэл мөрөөдөлд нь нөлөөлж шийдвэрээ гаргах гэж оролддог ээж аавтай хүүхдүүд өөрийгөө олох нь ховор.
2. Бусдын санал бодол өөрийнхөөс нь чухал. Ийм охид, хүүхнүүд байдаг. Өөрийн дур сонирхол, хүсэл мөрөөдлөөс илүү хүмүүс намайг муулчих вий, хүмүүс намайг харчих вий, хүмүүс намайг ингээд бодчихвий гэх айдас. Бусад хүмүүсийн өөрийнг нь үнэлэх үнэлэмж маш чухал. Бусдын санаа бодолд тааруулж юм хийдэг, бусдад таалагдах гэж бие авч явдаг, бусдаас сайхан үг сонсохын тулд зорилго тавьдаг хүмүүс өөрийгөө олох нь бага.
3. Бусдад худлаа ярьдаг хүмүүс өөрийгөө олох нь бага. Яагаад гэвэл тэд хэзээ худлаа ярьж эхэлснээ, хаана худлаа ярьснаа, яагаад худлаа ярьснаа хожим санадаггүй. Худлаа ярих тусам нүдэндээ бодит байдлыг олж хардаггүй байна. Өөрөөр хэлбэл хөөс мэт агаарт амьдарч эхэлдэг. Худал зүйл олон болохор үнэн болдог гэдэг нь бодит байдал дээр тэр нь биелэх биш харин ярьж байгаа хүний нүдийг таглаад ухааныг самруулж нээрээ л тийм гэж өөрөө итгэхэд хүрдэг гэнэ. Учир нь хүний тархи дурсамжыг яг фото зураг шиг хадгалдаггүй, харин бодож байгаагаар нь хадгалдагт алдаа оршдог гэнэ. Ийм хүмүүс өөрийгөө аль хэдийн гээсэн бөгөөд олоход тун бэрх байдаг аж.
Тэгэхээр хүүхдээ үүнээс сэргийлэхэд:
1. Аливаа хүүхэдтэй холбоотой зүйлийг хүүхдээсээ үргэлж асуу. Хувцас өмсөхөд нь хүртэл ямар хувцас өмсмөөр байгааг. Юунд сонирхолтой яагаад гэдгийг. Мэргэжил сонгох, хэл сурахад нь бүү тулга. Энэ бол хүүхдээ өөрийгөө олоход нь туслах алхам.
2. Бусдын юу хэлэхээс илүү өөрийнх бодол чухал гэдгийг хүүхдэдээ ойлгуулах. Хажууд нь бусдын тухай хов жив ярихгүй байх.
3. Худлаа ярих бол муухай, муу зүйл гэдгийг ойлгуулах. Жижиг зүйл дээр ч үүнийг эцэг эх маш их анхаарах ёстой байдаг байна.
Батчулууны Чимэдлхам
Герман улс
Энэ мэдээ танд таалагдаж байвал LIKE хийгээрэй. Танд баярлалаа.
