Шинэ цагийн өнгө

Twitter Print
2020 оны 05-р сар 28-нд 10:04 цагт
Мэдээний зураг,

01. Би насаараа ном эрдмийн мөр хөөж чамгүй туршлага хуримтлуулсан мундаг аав. Охин маань дэлхийн тэргүүлэгч гүрэн Америкт 10 жил сурч ажилласан айхтар амьтан.

02. Төгсөж ирсэн хойно нь туршлага мэдлэг хоёрын тулаан толхилцоон болсоон. Би туршлагадаа дулдуйдаж жаахан аавархаж, аархах санаатай. Охин маань цээжиндээ багтаж ядсан мэдлэгээрээ түрэх янзтай. Тэр болгоныг ухаант хань маань зөөллөж зөөтгөрүүлж байсан даа.

03. Би олон хэлний толь бичиг гаргасныг олон уншигч мэдэх буй за. Тэр дунд хятад хэлний галиг үсгийг оруулах гэж тамтай ажил байдаг. Тэрийг би эхнэрийн дүүгийн охинтой зунжин намаржин шивэх гэж ухнатаж гарна. Мөртлөө түүнээс хуримтлуулсан аргаа охиндоо өвлүүлэх юм шүү гэж боддог байснаа нуух юун.

04. Нэг өдөр охиныгоо суулгаж байгаад нөгөө 3 жилийн туршлагаа өвлүүлэн заах юм болтол "Аав минь дээ. Та арай ийм хүнд аргаар 3 жил өөрийгөө зовоосон юм биш биз дээ? Наадхи чинь ердөө гучин минутын ажил байна шүү дээ." гээд миний дараачийн ээлжинд хийхээр төлөвлөж байсан 250 000 үгтэй толь бичгийн галиг үсгийн асуудлыг хэлсэн хугацаандаа шийдээд өгч билээ. Охин маань тэрийг тооцоолуураар шийдэж байгааг харахад компьютерийн ард сууж байгаа биш төгөлдөр хуур дарж байгаа юм шиг харагдаж байсан шүү. Тэгээд сүүлчийн товчлуурыг дараад "За хар даа" гээд омог бардам хэлэхэд очоод хартал миний хуучин аргаар бараг 10 жил хийх ажлыг огт өө сэвгүй амжуулчихсан байхыг хараад үнэндээ ангайж хоцорсон доо.

05. Тэр шөнө би нойргүй хоносоон. Шөнөжин орондоо тэлчилж хонохдоо "Шинэ цаг үе иржээ. Залуусдаа итгэж байр сууриа тавьж өгөх ёстой юм байна." гэдгээ ухаарсан. Өөрийнхөө хоцрогдсон болохыг хүлээн зөвшөөрсөн хэрэг. Тэгээд Гэгээгийнхээ ажлыг охиндоо хүргэндээ хүлээлгэж өгөөд гэртээ номоо хийгээд суусан маань эргээд бодоход амьдралдаа гаргасан хамгийн том бөгөөд ухаалаг шийдлүүдийн нэг байсан санагдаж байна.

06. Улсын Их Хуралын өндөр сэнтий рүү ухаан зулаггүй зүтгэлдэх өвгөцүүл эмгэцүүл минь шинэ залуу сайхан боловсон хүчинд байр сууриа найр тавьж өгөөд над шиг ач зээ нартайгаа наадан тоглож байвал амьдралын баяр баясгалан тэр бус уу? Та нарын бодож зүтгээд байгаагаас илүү ихийг бүтээх шинэ залуу үе гараад ирсэн байна шүү.

Д.Болдбаатар 

"Гэгээ" боловсролын төв 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.