Цагдаагийн алба хаагчид угаартсан 1-70 насны долоон иргэний амийг аварчээ

Twitter Print
2019 оны 10-р сар 04-нд 08:35 цагт
Мэдээний зураг,

Өнгөрөгч есдүгээр сарын 28-ны шөнө 01:00 цагийн орчимд Хэнтий аймгийн Өмнөдэлгэр сумын төвд гэр хорооллын нүүрний эгнээнд хашаан доторх хоёр айлын гэр шатаж байгаа дуудлагыг тус сумын иргэн ирүүлжээ.

Энэ дагуу Жаргалтхаан сум дахь сум дундын цагдаагийн тасгийн харъяа Өмнөдэлгэр сумын хэсгийн төлөөлөгч, цагдаагийн дэслэгч Б.Суманхүү, цагдаа, цагдаагийн ахлагч Э.Наранбаатар, тус сумын иргэн Д.Мөнхбат нар очиж шатаж байсан гэрээс 7 хүнийг гаргаж амь насыг нь аварсан байна. Тэднийг очиход эзэнгүй нэг гэр нь шатаж дууссан, хажуу талынх нь гал авалцаж байсан гэрт Д.Цэемаа /70 нас, эм/, Б.Ууганбаяр /14 нас/, Б.Отгонбаяр /12 нас/, Э.Саруулбуян /9 нас/, Э.Цэлмүүн /5 нас/, У.Маргад /1 нас/ нар угаартсан байдалтай унтаж байжээ.

Алба хаагчдын ярьж байгаагаар эхлээд хүүхэд, том хүн нийлсэн 6 хүнийг гэрээс гаргасан байна. Хамгийн сүүлд хүн үлдсэн эсэхийг шалгахад У.Маргад гэх нэг настай охин орныхоо хөлд унасан байдалтай унтаж байхыг олж аварчээ. Мөн тухайн хашаанд байсан тээврийн хэрэгсэл, 30 гаруй сая төгрөгөөр шинэхэн баригдсан байшин, хураалттай өвс зэргийг галын аюулд өртөхөөс урьдчилан сэргийлж чадсан байна.

Галын шалтгаан нөхцлийг тодруулахаар холбогдох байгууллагууд шалгалт явуулж байгаа аж. Шатсан айлын эздүүд сумын төв дээр зохион байгуулагдаж байсан тэмцээнд оролцохоор явсан байжээ.

Г.Ганаа 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.