Бээжингийн хүн ам 2003 оноос хойш анх удаа буурчээ
БНХАУ-ын нийслэл Бээжин хотын хүн ам өнгөрсөн 20 жилийн хугацаанд анх удаа буурчээ.
2022 онд 21 сая гаруй хүн амтай Хятадын нийслэл хотод нас баралтын тоо төрөлтийн тооноос давж, хүн амын өсөлтийн үзүүлэлт нь 1000 хүн тутамд -0.05 болжээ. Энэ нь 2003 оноос хойш Бээжинд хүн амын урвуу өсөлт бүртгэгдсэн анхны тохиолдол аж.
Бээжин хотын захиргаанаас гаргасан статистикт үзүүлснээр тус хотод 1000 хүн тутамд 5.72 нас баралт, 1000 хүн тутамд 5.67 төрөлт бүртгэгдсэн ба мэргэжилтнүүдийн хэлж байгаагаар хүн амын өсөлт ийнхүү буурахад төрөлт буурахад нөлөөлсөн эдийн засаг болон нийгмийн хүчин зүйлс мөн адил нөлөөлжээ.
Австралийн Виктория их сургуулийн Бодлого судлалын төвийн ахлах судлаач Сюжян Пэний хэлснээр Бээжин дэх амьдралын өртөг, боловсролын зардал, иргэдийнх нь боловсролын зэргээс шалтгаалж тус хотын байнгын оршин суугчдын дунд төрөлтийн тоо бага байгаа нь хэвийн үзэгдэл аж.
Өнгөрсөн жил БНХАУ-д 1000 хүн тутамд 6.77 төрөлтийн тоо бүртгэгдсэн нь тус улсын түүхэн дэх хамгийн доод үзүүлэлт болсон юм. Бээжингийн хүн амын статистик тоо нь зөвхөн байнгын оршин суугчдын дунд явуулсан судалгаанаас гарсан ба судалгаанд тус хотод орон нутгаас ирж ажиллаж амьдарч байгаа олон сая иргэдийг оролцуулаагүй аж.
Хятадын эрх баригчид олон арван жилийн турш хэрэгжүүлж ирсэн "нэг хүүхэд" бодлогоо 2016 онд цуцалж, иргэддээ нэгээс олон хүүхэдтэй болохыг уриалсаар байгаа ч амьдралын өртөг, жендерийн хэвшмэл байдал, карьерийн өсөлт зэрэг хүчин зүйлсээс болж хүүхэдтэй болохоос татгалзах болжээ.
Эрх баригчдын зүгээс жирэмсэн эмэгтэйд үзүүлэх эрүүл мэндийн тусламж үйлчилгээг сайжруулах, үр суулгах үйлчилгээг хүртээмжтэй болгох, хөнгөлөлт урамшуулал олгох зэрэг ажлуудыг хийсэн ч иргэдийн хандлага өөрчлөгдөөгүй аж.
Эх сурвалж: The Guardian
Содномцэрэнгийн Энхзаяа
Mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
