Монгол юугаараа баян бэ?

Twitter Print
2020 оны 09-р сар 18-нд 11:30 цагт
Мэдээний зураг,

Ядуу буурай орон гэдэг үгэнд зэвүү хүрдэг. Хүмүүст нь ядуу гэж ойлгуулж хамаг баялгийг нь зөөсөөр ядуу болгосон жишээ мундахгүй олон байна.

Зав чөлөө, өргөн уудам нутаг, онгон дагшин байгаль, юу ч сэдээд хийсэн түүхий эд энд тэндгүй хөглөрч хэвтэхэд ядуу ядуу ядуу гээд л уншаад явдаг нэг чөтгөрийн тарнитай. Баян гээд байгаа орны хүмүүс баян тусмаа л ядуу. Зав чөлөөгөөр ядуу байх юм. Орон зайгаар ядуу байх юм. Итгэл сэтгэлээр, хайр халамжаар ядуурахын туйлд хүрчихсэн. Өөрийгөө ядуу гэж боддог нь өдөр бүр цагийн ажилд шогшиж ирээд авсан цалингаараа байрны түрээс түлээд үлдсэн мөнгөөр нь хоол ундаа залгуулна. Дунд зэргийн болно гэж зүтгэж буй нь машин гэж нэг чимээгүй хулгайчтай.

Машины татвар, засвар, шатахуун, сэлбэг, паркны мөнгө гээд нэг хүнтэй найзлах ч сөгөөгүй ядуу. Ах дүүтэйгээ ч нэг тайван суугаад аяга кофе уучихаж чадахгүй хавчиганаастай. Нийтийн унаанд сууж яваа эгэл олны дунд инээвхийлсэн царай өдрийн од. Бүгд нэг утас шагайчихсан, гөлийсөн, ярвайсан, сэтгэлийн гүн гутралд автаж дүнсийсэн царай. Нүдний харц хоосон. Нүүрэн дээр нь ердөө л зовлон зовиур, шаналал дарамт, стресс дүүрэн. Дундаас дээш санаатай нь бол өөрийгөө мөнхийн бусадтай харицуулаастай. Хичнээн зүтгээд ч эдлэж буй юмаараа ялгарахад хэцүү.

Баян гээд байгаа хэд нь хөрөнгөө манадаг нохой болчихсон. Хөрөнгө нь эзэн. Ийм эзэнтэй ядуучуул нь сэтгэцийн өвчтэй болчихсон байна. Бусдаасаа ялгарах тэмцээнд хүн төсөөлөхийн аргагүй гаж юмнууд хийж явдаг. Хүүхэд бузарлах гэх мэт. Эрх мэдэл, сүлжээгээрээ, өөрсөддөө тааруулж хийсэн шүүх цагдаагаараа халхавчилж есөн шидийн гэмт хэрэг үйлдэж явдаг. Баян орны ядуу, дунд, дээдэс бүх ангийнхан нь хоорондоо онцын ялгаагүй сэтгэлгээтэй. Энэ одоо тэгээд баян байгаа байдал уу? Хүний сүнс сүлд, оюун ухаан, сэтгэл зүй нэг хэвэнд цугтачихсан шиг байна гээд төсөөлөөд үз дээ? Амьд байгалиас тасархай, эх дэлхийгээсээ хүй нь тасарчихсан, байгалийн юм бүхэнд байдаг сүнс сүлд, лус савдаг, ид шид, гайхамшгийг мэдрэхээ больчихсон хөлдүү. Надад үүн шиг муухай ядуурал, шорон энэ хорвоод үгүй мэт санагддаг. Элэг нэгтнүүд минь баялагаа олж хараач дээ. Хичнээн баян хүмүүс болохоо нүдээ нээгээд хараач, чихээ онгойлгоод сонсооч, хоёр гараараа тэмтэрч үзээч дээ.

Бие биенээ нэг тэвэрч аваад үз дээ. Баялаг мөн шүү дээ. Хамгийн дээд баялаг. Баян нэртэй энэ хөгширчихсөн улс орны хүмүүсээс хавьгүй баян. Чөлөөтэй бодож сэтгэх, нэг хэв загварт орохгүй байх, хүн бүр өөрийнхөөрөө тааваараа амьдрах оюуны баялаг бөгөөд дээд баян. Үр хүүхэдтэй өнөр өтгөн, амар тайван амьдрах дараагийн баян. Эд хогшил хурааж хөрөнгө мөнгөний манаач нохой болж суух адгийн баян. Харин ч бүүр ядуугаас ядуу. Энэ муу ёрын тарниа боль л доо. Тархинд чинь гүн суулгасан шимэгч хорхой шүү дээ. Юугаар баянаа бодож, мэдэрч, ойлгож, ярьж сурая л даа бүгдээрээ. Монгол юугаараа баян бэ? Монгол хүн юугаараа баян бэ? Монгол улс өргөн уудам нутаг, газар дээрхи доорхи эрдэнэс эрдсээр дүүрэн, буянт таван хошуу малаараа баян орон. Монгол хүн бол дэлхийн өөр үндэстэнтэй харьцуулахын аргагүй удмын сангаараа баян. Язгууртнуудын дайнч баатарлаг түүхээс илүү эгэл ардын маань туулж ирсэн элдэв бэрхшээл, адал явдал, үзсэн газар, уулзсан хүмүүсээс удмын мэдээ бидэнд үлдсэн юм.

Хаанахын ямар ч үндэстэнтэй харьцуулахын аргагүй арвин сан. Энэ баялаг бол харин өвөг дээдсийн замаар явсан хүн л хүртэж болдог буян. Тэдний замаар явж гэмээ нь удмын мэдээ нь идэвхижиж сэргэдэг, улам хөгждөг. Үүнийг баялаг гэхгүй өөр юуг баялаг гэх вэ? Монголчууд суурин иргэншлийн улс орныг дайрч довтлож эзлээд хааныг нь гянданд хийгээд хоолны оронд алт өгч байсан тухай араб түүхч ярьж байхыг сонссон. Эзэлсэн орныхоо хүмүүсээс дархан, мужаан, оёдолчин, барилгачин, чулууны дархан, инженерүүдийг нь олзлоод аваад явдаг байсан гэдэг. Юуг баялаг гэж үзэж байсан байна? Хүний ухаан, эзэмшсэн ур чадвар, юу хийж чаддагийг нь үнэлэж байсан. Ийм ард түмэн тэгээд одоо яахаараа өөрсдийгөө ядуу гээд явах ёстой юм бэ?

Б.Алтантуяа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • Зочин

      (103.26.194.114) 2013-11-03 21:23
      • 0
      • 0

      Sonin l medee baina. Ulamjlal orchin uyd zohitsoldohgui baigaa yum bna.

      Хариулах