Хойд Солонгосын зүгээс анх удаа албан ёсоор улсад нь коронавирусын халдвар бүртгэгдсэнээ зарлажээ. Хойд Солонгосын төрийн өмчит хэвлэл мэдээллийн хэрэгслээр мэдээлснээр нийслэл Пхеньянд халдварлах чадвар өндөртэй коронавирусын омикрон хувилбар бүртгэгджээ. "2020 оны 2-р сараас хойш хоёр жилийн турш халдвар тархахаас сэргийлж чадсан халдвар хамгааллын дэглэмд цоорхой гарч манай улсад онц байдал үүслээ." хэмээн онцолжээ.
Хойд Солонгосын зүгээс омикрон хувилбарын халдвар тархалтын тухай мэдээлсэн ч тохиолдлуудын тоо болон халдварын анхны эх үүсвэрийн талаар мэдээлэл өгөөгүй байна.
Коронавирусын халдварын тархалттай холбоотойгоор Хойд Солонгосын удирдагч Ким Жон Ун эрх баригч Ажилчдын намын гишүүдтэй уулзаж, халдварын тархалттай хэрхэн тэмцэх тухай хэлэлцсэн байна. Уулзалтын үеэр Ким Жон Ун халдварын тархалтыг хяналтанд авч, халдварын эх үүсвэрээс дахин халдвар тархах боломжийг нь үгүй хийхийг үүрэг болгожээ.
Коронавирусын цар тахал эхэлснээс хойш хилээ бүрэн хааснаараа Хойд Солонгос коронавирусын халдвараас ангид байж чадсан хэмээн эрх баригчид нь онцолж байсан юм. Гэсэн хэдий ч цөмийн хөтөлбөрийнхөө улмаас АНУ болон барууны хоригт орж, эдийн засгийн нөхцөл байдал нь хэдийн муудсан байсан дээрээ хилээ бүрэн хааснаар Хойд Солонгосын эдийн засаг хүнд цохилтонд орсон билээ.
Эх сурвалж: The Guardian
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
