Токио Фүкүшима АЦС-ын хаягдал усыг Номхон далай руу асгаж эхэлсэнтэй холбоотойгоор тус улсын далайн бүтээгдэхүүний хамгийн том худалдан авагч Бээжин Японы далайн бүтээгдэхүүний импортонд хориг тавина гэдгээ мэдэгджээ.
Токио болон Олон Улсын Атомын Эрчим Хүчний Агентлаг Фүкүшима АЦС-ын цэвэршүүлсэн хаягдал усыг далайд асгах нь аюулгүй гэдгийг удаа дараа онцолсон билээ.
Фүкүшима АЦС-ын реакторыг хөргөхөд ашигласан сая гаруй тонн хаягдал ус тус АЦС-д цуглараад байгаа ба төлөвлөгөөний дагуу уг хаягдал усыг ирэх 30 жилийн хугацаанд Номхон далай руу асгах аж. Энэхүү төлөвлөгөөг 2 жилийн өмнө анх танилцуулснаас хойш Бээжин эсэргүүцлээ илэрхийлж, хаягдал усыг далайд асгах нь "амиа бодсон, хариуцлагагүй" үйлдэл хэмээн тодорхойлж байсан юм.
Пүрэв гарагаас эхлэн Токио Фүкүшима АЦС-ын хаягдал усыг Номхон далай руу асгаж эхэлснээр Хятадын Гаалийн алба Фүкүшима болон Японы хэд хэдэн засаг захиргааны нэгжээс далайн бүтээгдэхүүн импортлохыг хориглосон шийдвэрээ өргөжүүлж, "Хятад улсын хэрэглэгчдийн эрүүл мэндийг хамгаалах" үүднээс Японы бүх нутаг дэвсгэрээс далайн бүтээгдэхүүн импортлохыг хоригложээ.
Энэхүү шийдвэр нь Японы эдийн засагт том цохилт болох аж. Их газрын Хятад, Хонгконгийн тусгай захиргааны бүс нь Японоос жил бүр 1.1 тэрбум ам.долларын үнэ бүхий далайн бүтээгдэхүүн импортлож, Японы далайн бүтээгдэхүүний экспортын тал орчим хувийг дангаараа эзэлдэг аж.
Нөгөө талаас олон улсын шинжээчид Бээжингээс гаргасан шийдвэр нь улс төрийн зорилготой гэж харж байна. Сүүлийн жилүүдэд Япон-Америкийн харилцаа сайжрахын хэрээр Япон-Хятадын харилцаа муудсан.
Гэсэн ч Бээжин дээрх шийдвэрээ удаан хугацаанд хэрэгжүүлж чадахгүй, эдийн засгийн өсөлтөө дэмжих үүднээс Хятадын эрх баригчид дотоодын импортлогчид болон бизнесүүдэд сөрөг нөлөө үзүүлэх хоригуудыг удаан хугацаагаар үргэлжлүүлэх боломжгүй хэмээн ажиглагчид үзэж байна.
Эх сурвалж: meduza.io
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
