Украины Ерөнхийлөгч Владимир Зеленский Кремль "эрчим хүчний террорист ажиллагаа" явуулж байна хэмээн буруушаажээ. Түүний хэлж байгаагаар ОХУ-ын пуужингийн цохилтын улмаас 4.5 сая хүн тог цахилгаангүй хоцорчээ.
Өнгөрсөн хэдэн долоо хоногт Украины арми оросуудад эзлэгдээд байсан хэд хэдэн сууринг эргүүлэн хяналтандаа авсантай холбоотойгоор оросууд Украины эрчим хүчний дэд бүтцүүдэд пуужингийн болон дроны цохилт эрчимтэйгээр үзүүлж эхэлсэн юм.
Өнгөрсөн 1 сарын хугацаанд оросууд Украины цахилгаан эрчим хүчний станцуудын 1/3-ийг устгасан ба үүнтэй холбоотойгоор Украины засгийн газар ард иргэдээ цахилгаанаа хэмнэхийг зөвлөж байна.
В. Зеленскийн хэлснээр ОХУ Украины эрчим хүчний дэд бүтцүүдийг онилж байгаа нь оросууд дайны талбарт амжилт олохгүй байгаатай нь холбоотой аж. Тэрээр, "Оросууд эрчим хүчний террорист ажиллагаа явуулж байгаа нь дайсны сул талыг харуулж байна. Тэд украинчуудыг тулааны талбар дээр ялж чадахгүй байгаа учраас ийм байдлаар хүмүүсийг дарамтлах гэж оролдож байна." хэмээн мэдэгджээ.
Нөгөө талаас ОХУ-ын Батлан хамгаалахын яам Украины эрчим хүчний объектуудыг байгаа болгож байгааг хүлээн зөвшөөрчээ.
Сүүлийн үеийн мэдээгээр оросын цэргүүд Херсон хотоос гарч эхэлсэн ба зарим нэг эх сурвалжуудын мэдээлснээр Херсон хотод алба хааж байсан оросын армийн офицерууд бүгд хотоос хэдийн явсан аж.
Херсон хотод нөхцөл байдал яг ямар байгааг хэлэх боломжгүй ч оросын цэргүүд хотоос гарч байгаа нь тодорхой, бөгөөд оросын цэргүүд хотын банкнуудыг хоосолж, музейнуудыг нь тоносон гэжээ.
Украины томоохон хотуудын нэг Херсон хот өнгөрсөн 3-р сард оросуудад эзлэгдсэн ч Украины армийн сөрөг довтолгооны улмаас оросууд хотыг орхиход хүрээд байгаа аж.
Эх сурвалж: BBC
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
