Газын зурваст эхний ээлжийн хүмүүнлэгийн тусламж хүрэв

Twitter Print
2023 оны 10-р сар 22-нд 12:21 цагт
Мэдээний зураг,

Өнгөрсөн бямба гарагийн өглөө Газын зурвас-Египетийн хил дээрх Рафа хилийн шалган нэвтрүүлэх цэг онгойж, хүмүүнлэгийн тусламжийн бараа тээвэрлэсэн ачааны машинууд Газын зурвас луу хөдөлжээ.

Өнөөдрийн байдлаар Израиль Газын зурвас луу зөвхөн эм тариа, хүнс ачсан 20 ачааны машин оруулахыг зөвшөөрсөн ба машинууд Газын зурьас луу орсон даруйд Рафа хилийн шалган нэвтрүүлэх цэгийг хаасан байна.

НҮБ-аас Газын зурвасын 2 сая оршин суугчдад эхний ээлжинд илгээсэн тусламжаас 5 дахин их тусламж шаардлагатай тэр дундаа эмнэлгүүдийг цахилгаан эрчим хүчээр хангах, гүнээс цэвэр ус гаргахад түлш хэрэгтэй байгааг онцолжээ.

ХАМАС бүлэглэл Израильд цохилт үзүүлж, иргэдийг нь барьцаалсны хариуд Тель Авив Газын зурвасыг цахилгаан эрчим хүч, цэвэр усаар хангахаа зогсоосон юм.

НҮБ зөрчилдөж буй талуудтай олон хоногийн турш хэлэлцсэний эцэст Газын зурвас луу хүмүүнлэгийн тусламж бүхий 20 ачааны машин оруулахаар болсон билээ.

Рафа хилийн шалган нэвтрүүлэх цэг дээр нийт эм тариа, хүнс, цэвэр ус зэрэг нэн шаардлагатай тусламжийн бараа ачсан 175 ачааны машин Газын зурвас луу орох зөвшөөрлөө хүлээн зогсоож байгаа аж.

Цаашид Газын зурвас луу нэмж хүмүүнлэгийн тусламж оруулах эсэхийг шийдэхээсээ өмнө Тель Авив уг тусламжийн барааг ХАМАС бүлэглэл замаас нь хураан авахгүй гэсэн баталгааг шаардаж байгаа аж.

Рафа хилийн шалган нэвтрүүлэх цэг нь Газын зурвас болон Египет хоорондын хил дээр байрлах ба Израиль зөвхөн уг цэгээр дамжуулан Газын зурвас луу тусламжийн бараа оруулахыг зөвшөөрсөн юм.

ХАМАС бүлэглэл Газын зурваст орж ирсэн хүмүүнлэгийн тусламж бүхий 20 ачааны машин нь Газын зурвасын эмнэлгүүдэд үүссэн гамшгийн нөхцөл байдлын өөрчилж чадахгүй хэмээн мэдэгдсэн бол НҮБ-ын Ерөнхий нарийн бичгийн дарга Антониу Гуттереш Газын зурвасыг хүмүүнлэгийн тусламжаар таслахгүй байх гарц гаргалгааг шуурхай шийдвэрлэхийг уриалжээ. Тэрээр өнгөрсөн баасан гарагт Рафа хилийн шалган нэвтрүүлэх цэг дээр очиж, нөхцөл байдалтай танилцах үеэрээ, "Шалган нэвтрүүлэх цэгийн нэг талд хоол хүнс зэрэг нэн шаардлагатай бараа дүүртэл чихсэн олон зуун ачааны машинууд нөгөө талд 2 сая хүн ямар ч ус, хүнс, түлш, эм тариагүй амьдарч байна. Хүүхдүүд, ээжүүд, хөгшин настай, өвчин эмгэгтэй хүмүүс. Нэг талд дүүрэн бараатай ачааны машинууд, нөгөө талд хоосон ходооднууд." хэмээн онцолжээ.

Өнгөрсөн баасан гарагт Египетийн нийслэл Каир хотод Израиль-ХАМАС-ын зөрчлийг энхийн замаар шийдэх асуудлыг хэлэлцэх чуулга уулзалт болсон ч барууны орнууд арабын орнуудтай зөвшилцөлд хүрч чадаагүйгээс чуулга уулзалт ямар нэг тодорхой үр дүнгүй дууссан байна. Уг чуулга уулзалтанд оролцсон Палестины Ерөнхийлөгч Махмуд Аббас оролцсон ба тэрээр Израилийн зүгээс Газын зурвас, Иерусалим, Йорданы баруун эргээс палестинчуудыг хөөн гаргахыг оролдож байгааг онцолж, "Бид ямар ч бэрхшээл саад байсан хэзээ ч өөрсдийн газар нутгаасаа явахгүй." хэмээн мэдэгджээ.

Түүнчлэн Ойрх Дорнодын хэд хэдэн улс Израилийн Газын зурваст үзүүлсэн цохилтуудыг хатуу буруушаасан байна. Францын Гадаад харилцааны сайд Катрин Колонна, "Израиль дахин ийм зүйлс тохиолдохоос сэргийлж өөрийгөө хамгаалах эрхтэй. Гэхдээ гаргасан үйлднл, шийдвэрүүд ь шударга ёсонд нийцсэн, олон улсын хууль журмын дагуу байх ёстой. Бид ХАМАС бүлэглэлийн үйлдлийн буруушааж байна, бусад улс орнуудыг ч бас тэгээсэй гэж уриалж байна. ХАМАС палестинчуудыг төлөөлдөггүй. Энгийн иргэд тус бүлэглэлийн үйлдлийн хариуцлагыг хүлээх ёсгүй." хэмээн мэдэгдсэн байна.

Чуулга уулзалтыг зохион байгуулсан Египетийн Ерөнхийлөгч Абдель Фаттах Ас Сиси уг чуулга уулзалтаар Ойрх Дорнодод нөхцөл байдал хурцдахаас сэргийлж, Израиль-ХАМАС-ын зөрчлийг энхийн замаар шийдэхийг эрмэлзсэн ч чуулга уулзалтанд Израиль, АНУ, Ираны төлөөлөгчид оролцоогүй аж.

Израилийн эрх баригчдын мэдээлж байгаагаар ХАМАС бүлэглэлийн дайралтаас болж Израильд 1400 гаруй хүн амиа алдсан бол Газын зурваст Израилийг агаарын цохилтоос болж 4000 гаруй хүн амь үрэгдээд байгаа юм.

ХАМАС бүлэглэлийн барьцаанд 200 гаруй хүн байгаа ба ХАМАС бүлэглэлийн улс төрийн товчооны гишүүн Мохаммед Назаль Аль Жазира сувагт өгсөн ярилцлагадаа Израиль түрэмгийллээ зогсоосон тохиолдолд барьцаанд байгаа энгийн иргэдийг суллахад бэлэн гэдгээ мэдэгджээ.

Өнгөрсөн бямба гарагт ХАМАС бүлэглэл барьцаанд байсан АНУ-ын иргэнийг сулласан байна.

Эх сурвалж: BBC

Содномцэрэнгийн Энхзаяа 

mongolcom.mn 

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.