Израилийн дараагийн Ерөнхий сайдаар технологийн салбараас төрсөн саятан томилогдоно

Twitter Print
2021 оны 05-р сар 31-нд 14:05 цагт
Мэдээний зураг,

Израилийн Ерөнхий сайдын албан тушаалыг хамгийн удаан хашиж буй Беньямин Нетаньяху ойрын хугацаанд албан тушаалаасаа огцрох төлөвтэй байна. Учир нь Израилийн барууны төвтэй Ямина намын тэргүүн Нафтали Беннет өнгөрсөн ням гарагт Израилийн сөрөг хүчний центрист Өөрчлөлтийн блок намын тэргүүн Яир Лапидтай эвслийн шинэ засгийн газар байгуулах талаар хэлэлцэж буйгаа мэдэгджээ.

Энэ нь Израилийн улс төрийн салбарт гарч буй томоохон үйл явдал бөгөөд эвслийн засгийн газар байгуулагдсан тохиолдолд Израилийн төрийн эрхийг 12 жил жолоодсон Беньямин Нетаньяхугийн эрин үе төгсөх юм. Нафтали Беннетийн мэдэгдсэнээр тэрээр дээрх шийдвэрийг Израилийн улс төрийн тогтвортой байдлыг хангаж, парламентын сонгууль дахин явагдахаас сэргийлэх зорилгоор гаргажээ.

Сүүлийн хэдхэн сарын дотор Израильд парламентын сонгууль 4 удаа явагдсан билээ.

Нөгөө талаас Ерөнхий сайд Беньямин Нетаньяху Нафтали Беннет өмнө нь Яир Лапид болон түүний сөрөг хүчний намтай хүч нэгтгэхгүй гэж амлаж байсан тухай онцолж, Н.Беннет ард иргэдийг төөрөгдүүлж, "зууны луйвар" зохион байгуулах гэж байна хэмээн буруушаажээ.

Тэрээр уг эвслийн засгийн газар Израилийн аюулгүй байдал болон ирээдүйд аюул учруулна хэмээн үзэж буйгаа илэрхийлсэн байна. Израилийн дараагийн Ерөнхий сайдаар томилогдох өндөр магадлалтай гэгдээд байгаа 49 настай Нафтали Беннет нь технологийн салбараас төрсөн саятан бөгөөд тэрээр 2013 онд анх улс төрд оржээ.

Н.Беннет Беньямин Нетаньяхугийн засгийн газарт Батлан хамгаалахын сайдаас гадна Боловсрол болон Сангийн сайдын албан тушаалд ажиллаж байсан туршлагатай аж.

Израилийн хэвлэл мэдээллийн хэрэгслүүдээр Нафтали Беннетийн сөрөг хүчний намтай эвслийн засгийн газар байгуулах зөвшилцөлд Н.Беннет Израилийн Ерөнхий сайдаар 2 жил ажилласныхаа дараа уг албан тушаалаа Яир Лапидад дамжуулах талаар тусгасан талаар бичиж байна.

Эх сурвалж: https://www.bbc.com/news/world-middle-east

Содномцэрэнгийн Энхзаяа

mongolcom.mn

 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.