Мод сөөг тарих дуртай, эсвэл сонирхож буй найзууддаа хэлэх зүйл байна.
Аливаа мод бутны суулгацыг авахдаа үндэсний байдал, гэмтэл ихтэй эсэх, үндэс мөчрийн хаталттай эсэхийг анхаарах хэрэгтэй. Ингэхдээ уг суулгац нь чийгтэй шороонд эсвэл чийгтэй үртсэнд үндэс нь бүтнээрээ дүрэгдсэн байгаа эсэхийг харна. Мөчрийн үзүүрийг зөөлөн барьж бас хугалах гэж буй мэт тахийлгаж үзнэ. Хуурайшилттай, хаталттай модны үзүүр хуурай хатуу, хөшүүн байна. Амархан хугарна. Чийг алдаагүй, амьд бол мөчрийн үзүүр нь чийглэг, хүйтэн мэдрэгдэх ба тахийлгахад зөөлөн, хугарахгүй. Бас өнгө зүс нь хэвийн байх учиртай.
Суулгац аваад тарихдаа олон хүмүүсийн нийтлэг гаргадаг алдаа бол яг суулгах үедээ нөгөө нойтон бх ёстой үндсийг нь ил гаргаж орхиод нар салхинд эврээгээд хатаачихдаг. Ингэвэл нөгөө бяцхан суулгац маань үхнэ гэсэн үг. Хувин саванд хар шороог усаар зуурч нялцгай шавар болгоод түүндээ дүрж, яг суулгах үедээ түүнээсээ авч хатах боломж гаргалгүй суулгах хэрэгтэй.
Бас нэг анхаарах зүйл бол суулгацынхаа үндэс орчимд хөндий хоосон зай үлдээхгүйг хичээх хэрэгтэй. Хэрэв үндэс орчмыг сайн чигжиж дагтаршуулалгүй орхивол суулгацны үндэс хатаж уг мод ургахгүйд хүрдэг.
Суулгахаас өмнө тогоогоо услаж хонуулах нь сайн.
Тогоог дөрвөлжин хэлбэртэй ухах нь дараа нь хөлөөрөө дэвсэлж чигжихэд маш тохиромжтой байдаг.
Бордооны тухайд бол бууц болон сангасыг дураараа хэрэглэж болохгүй. Учир нь эдгээр нь хүчиллэг агууламж өндөр байдаг ба заавал задалж саармагжуулж байж хэрэглэхгүй бол ургамалын үндсийг түлэх эрсдэлтэй.
Одоо ч янз бүрийн сайхан бордоонууд элбэг болжээ.
Мод тарьж, өөртөө бас эх дэлхийдээ тустай ажил хийх хүсэлтэй бүх хүнд амжилт хүсье.
Монгол овогт Намхайдоржийн Цогтмандах
Энэ мэдээ танд таалагдаж байвал LIKE хийгээрэй. Танд баярлалаа.
