Өнгөрсөн даваа гарагт Бельгийн Брюссель хотноо хэрэглээний бараа, үйлчилгээний үнэ огцом өсөж буйг эсэргүүцсэн иргэд засгийн газраас энэ тал дээр даруй арга хэмжээ авахыг шаардан жагсжээ.
Жагсаалд нийт 70 мянга орчим хүн оролцсоны дийлэнх нь Бельгийн нисэх онгоцны буудал, нийтийн тээврийн ажилчид бөгөөд тэд жагсаалд оролцохын тулд нэг өдрийн ажил хаялт зарлажээ.
Жагсагчдын зарим нь засгийн газар бодитой арга хэмжээ даруй авах ёстой гэж үзэж байгаа бол зарим нь ажил олгогчид цалингаа нэмж, ажлын байрныхаа орчинг сайжруулах ёстой гэж үзэж байна.
Үйлдвэрчний эвлэлүүд жагсаалд 80 мянган ажилчид оролцсон гэсэн бол Брюсселийн цагдаагийн албанаас ойролцоогоор 70 мянган хүн байсан хэмээн мэдээлжээ.
Брюсселийн нисэх онгоцны буудал зарим онгоцнуудын нислэгийг цуцлахад хүрсэн бол нийтийн тээврийн хөдөлгөөн цөөн хэдэн шугамаас бусад нь зогсоход хүрсэн байна.
Энэ 6-р сард Бельгийн инфляцийн түвшин огцом нэмэгдэж, 9 хувьд хүрсэн ба энэ нь голчлон ОХУ Украин руу цэргээ оруулснаас болж импортын бараа бүтээгдэхүүний нийлүүлэлт тасарч, эрчим хүч, өргөн хэрэглээний бараа бүтээгдэхүүний үнэ өссөнтэй холбоотой аж.
Бельгийн Ерөнхий сайд Александр Де Кру телевизэд өгсөн ярилцлагадаа Европын бусад улс орнуудтай харьцуулахад Бельгид цалин хөлсний хэмжээг инфляцийн түвшинг бодолцож олгодог гэдгийг онцлохын зэрэгцээ Бельгийн засгийн газар хий, цахилгаан эрчим хүч, түлшний татварт тогтоосон хөнгөлөлтөө энэ оныг дуустал үргэлжлүүлнэ гэжээ.
Бельгийн Brussels Airlines компанийн нисгэгчид болон онгоцны үйлчлэгч нар энэ сарын 23-25-нд ажил хаялт зарлахаар төлөвлөсөн ба Ryanair компанийн Бельги дахь салбарын ажилчид ирэх баасан гарагаас 3 хоногийн ажил хаялт зарлахаа мэдэгджээ.
https://www.reuters.com
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
