Энэ сонгууль эх орноо аврагсдыг хүлээж байна

Twitter Print
2020 оны 05-р сар 10-нд 11:55 цагт
Мэдээний зураг,

Монгол орон минь эцэстээ тултал дэндүү хүнд байдалд оржээ. Аврал эрж байна, үнэндээ архаг өвчтэй, мэс засалчидаа, аврагсдаа үгүйлж байна.

"Чөтгөрийн тойрог" баруун, зүүн гарт СААРАЛ, ХАР хоёр дансаар хацар алгадаж, хатуу тооцоо хийхээр өдөр шөнөгүй амраахгүй довтолгож байна. 2020 оны сонгуулийг алдвал Монголоо алдана. Тэд хэн бэ? Бид хаашаа явах вэ? Аврагсад байна уу? Бас дахин шинэ үеийн авлигачидын жагсаал эгнээ эгнээгээр төв, хөдөөд айсуй юу? Улсын хөрөнгө мөнгийг "шимэгч" том, дунд, жижиг хорхойнуудаас салж чадах уу? Мэдлэг боловсрол хамаатай ч ЗҮРХ СЭТГЭЛИЙН БОЛОВСРОЛ, ДОТООД СЭТГЭЛИЙН БОЛОВСРОЛГҮЙ бол хэчнээн Харвард, Стэнфорд, Йеэлийн сургуулийг төгссөн хамаагүй. Ийм байдлаар "цус сэлбэгдээд" яаж ч дүрээ хувиргаад нэмэргүй.

Юугаар ч дутаагүй, нэр хүндээр шагшигдаж байсан хайран сайхан МОНГОЛ ОРОН минь улс улсын, орон орны адаг болсон дайн самуун, гуйланчлал, авлигал, хүчирхийлэлийн "өлгий" болсон тэр нэрийг нь амьдралдаа сонсож байгаагүй, мэдэгдэхгүй орнуудын дунд адгийн адагт, ёроолын ёроолд нь уначихлаа. Цаазын цалам ойрхон байна, хэнд ч мэдрэгдээд л байсан даа. Дайчин шуурхай ажиллагаа, зүтгэл чармайлт, улстөрийн мэдрэмж нь хаашаа алга болсон хүмүүс удирдаад байнаа? Өнөөдрийн шийдвэрээ маргааш өөрчилнө. УИХ ихэнхдээ хөгжлийн чөдөр тээг болж ирсэн шүү. Нэг хүний удирдлага алдаа гаргах осолтой ч хурдан түргэндээ сайн талтай. ӨР ӨР, БАС ДАХИН ӨРИЙН цаламаас яаж гарах вэ?

Энэхүү "чөтгөрийн тойргоос" гарч чадах уу? Үгүй юу? гэдгийг хууртаж дуусдаггүй ард түмэн гэдэг барьж авах юмгүй, хэн дуртай нь нэр барин донгоддог хоосон нэртэй улс л мэдэх боллоо. Ард түмэн ердөө 3-хан минутад л төр барьж байгаа юм шүү дээ. Энэ 3 МИНУТЫГ алдвал 30 жилийг алдснаа одоо л ойлгож гасалж байна.

Залуусаар "ЦУС СЭЛБЭХ" цаг болсон! Тэдэнд нэг гэм бий. Дан нас чацуутан, ойролцоо насныханд бие биенээ илүүтэй мэддэг болохоор нанчилдаан, зодоон үргэлж гарч байдаг осолтой. "Чамайг ямар мэдэхгүй биш" гээд л сурагчийн ширээ, оюутны ширээнд тохой залгаж суусан найз руугаа дайрна. Тэр үед зангарагтай чанга дуугарч, нударгатай загначихдаг ахмад егзөрүүд хэрэгтэй. "Ахмадууд нь залуусаа тоодоггүй, залуус нь ахмадуудыгаа голдог "өвчин хүмүүн төрөлхтний ужиг өвчин.Улстөрд туршлага хэрэггүй гэдэг нь гэнэн төөрөгдөл. Туршлага гэдгийг хоцрогдол гэж ойлгож байгаа нь тэр юмуу? "Элээсэн оймс" ч бас цоо шинэ оймсын хажууд түүх намтартай шүү.

Монголын ерөнхий сайдын сэнтий хэзээнээсээ хатуу ширүүн байдаг ч , өнөөдрийнх шиг хатуу нь бараг байгаагүй. Ер нь сэтгэлээр зовлонгүй, жаргалтай явдаг улс гэвэл дүүрэн биш, боломжийн дундчууд л байдаг "Баян хүнийг балаг тойрдоггүй бол "Авлигач томчуудыг шорон тойрдоггүй" Үүнийг л зүрхэндээ хүртэл мэдрээд ойлгох цаг хэзээ ирэх вэ?

Хамгийн аюултай шимэгчид бол төр, засгийн ДУНД, ДООД шатныхан шүү. Тэднийг хараанаасаа салгаж болохгүй. Хамартаа баас түрхчихсэн юм шиг ямар их зантай, ямар амархан зангаа хувиргагчид, ямар сэхүүн амьтад байдаг гээ. Дээдчүүл нь доодчуулыгаа мартчихсан байдгаас хамаг гай тарьж байгаа.

"Хүн муугаа, тэмээ гэдгэрээ мэддэггүй" гэсэн мэргэн үг өнөөдөр мөн ч чанга дуулдаж байнаа. Бие даан нэр дэвшигчид өөрсдийгөө хэн бэ? би юу хийж чадах юм бэ? би урд өмнөхүүдээсээ юугаар илүү вэ? надад ямар бодлого байгаа билээ? намайг хэн тоох билээ? гэдгийг эрхбиш бодмоор. Сайн залуус ч байна лээ. Хонь хурга нийлсэн юм шиг баахан шагшаан шуугиан, эрээвэр хураавар, бусдаасаа давах гэсэн хэнээрхэл, шинэ сандал ширээний өвчин, бушуухан нэрд гарах гэсэн балайрал газар авах вий дээ. Би "БАЛАЙРАЛ" гэдэг нэртэй эсээ 20 гаруй жилийн өмнө бичиж байсан даа. Тэр үед ч харин балайрал толгодын чинээ байсан юм байна. Одоо далайн чинээ цалгиж байна.

Төр барих 3 минутын хугацаагаа алт болгох уу? Авлигачдын дараа дараачийн давалгаанд алдах уу. 

До.Цэнджав 

2020. 05. 09

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • Бурхан

      (103.9.89.18) 2019-12-05 11:10
      • 0
      • 0

      Ингээд хариуцлага тооцоод эхлэвэл сайн байна.

      Хариулах